धादिङ । धादिङ त्रिपुरासुन्दरी गाउँपालिकाका रमेश अधिकारीले ‘एसियाज बेस्ट प्रिन्सिपल अवार्ड’ प्राप्त गरेका छन् । अधिकरी काठमाण्डौँको बसुन्धारामा अवस्थित साउथ वेस्टन स्कुलका प्रिन्सिपल हुन् ।
एसिया अवार्डबाट सम्म्मानित यस कार्यक्रमको आयोजना रुला अवार्डद्वारा गरिएको थियो । यस अन्तराष्ट्रिय स्तरको स्कुल अवार्डका लागि ३० देशका २०० भन्दा बढी विद्यालयहरूले प्रतिस्पर्धा गरेका थिए । प्रिन्सिपल अधिकारीले सोही कार्यक्रममा ‘एसियाज भिजिनरी प्रिन्सिपल अवार्ड’ पनि प्राप्त गरे ।
२०२१ मार्चमा मनोनयन दर्ता भएको उक्त अवार्डका लागि विभिन्न चरणहरू पार गर्दै प्रिन्सिपल अधिकारीले उक्त अवार्ड हात पारेका हुन् । मूल्याङ्कनका क्रममा डकुमेन्ट प्रिजेन्टेसन, भर्चुअल प्रिजेन्टेसन, अन्तर्वार्ता, शैक्षिक सन्दर्शन तथा योजना, शिक्षा क्षेत्रको योगदान, आदिलाई आधार बनाइएको थियो ।
भर्चुअल माध्यमबाट विद्यालय र यसले सञ्चालन गरेका शैक्षिक गतिविधिहरूको बारेमा निर्णायक मण्डलले समग्र जानकारी लिएको बताइएको छ । उक्त अवार्डका लागि निर्णायक मण्डलका सदस्यहरूले विद्यालयबाट सञ्चालित अनलाइन कक्षा तथा अतिरिक्त क्रियाकलापका कार्यक्रमहरूको अनलाइन अवलोकन गरका थिए । उनीहरुले वर्तमान अवस्थामा साउथवेस्टन स्कुलले विकास गरेको विद्यार्थीे सिकाइ पद्धति, मूल्याङ्कन प्रणाली तथा अतिरिक्त क्रियाकलापका बारेमा प्रशंसा गरेका थिए ।
