महानगरीय प्रहरी वृत्त हिरासतमा सुनका गहना गायब

Avatar photo
Dhadingpost
शुक्रबार, बैशाख २१, २०७५

 

काठमाडौं,बैशाख २१। महानगरीय प्रहरी वृत्त, दरबारमार्गको हिरासतमा रहेका दुई अभियुक्तको सुनका गहना हराएपछि घटनाबारे अनुसन्धान गर्न छानबिन समिति गठन भएको छ ।

उनीहरु राति साढे ९ बजे जमल क्षेत्रबाट पक्राउ परेका थिए । सार्वजनिक अपराधमा अनुसन्धानपछि ३ वैशाखमा छुटे । तर, निस्किने वेलामा आफ्नो सबै गहन पाएनन् ।

प्रहरी वृत्तभित्र सुन गायब भएको खबर वृत्तका प्रमुख प्रहरी नायब उपरीक्षक (डिएसपी) दानबहादुर मल्लसम्म पुग्यो । घटनाको अनुसन्धानका लागि प्रहरी निरीक्षक वसन्त आचार्यको नेतृत्वमा छानबिन समिति नै गठन भएको छ ।

समितिमा सई एकराम खड्का, मुद्दा शाखाका असई प्रेम शाही, हवल्दार वीरबहादुर सुनुवार र प्रहरी जवान मोहन बुढाथोकी छन् ।

समितिले हालसम्म गायब भएको सुन कहाँ गयो भन्ने पत्ता लगाउन सकेको छैन ।

डिएसपी मल्लले घटनाबारे ढिला गरी आफूलाई जानकारी भएको अनलाइनखबरलाई बताए । उनले भने, ‘समिति बनेको छ, त्यसले धेरै कुरा हल गरिसकेको छ ।’

यसअघि पनि सोही वृत्तका प्रहरी अधिकारीले होटल ल्याण्डमार्कमा युवतीमाथि भएको सामूहिक बलात्कारमा पीडित र पीडकलाई मिलापत्र गराएका थिए ।

जसमा तत्कालिन प्रहरी प्रमुख डिएसपी तिलक भारती त्यहाँको प्रमुखबाट हटाइएका थिए भने प्रहरी निरीक्षक लक्ष्मणसिंह ठकुरी निलम्बनमा परेका थिए ।

गत २२ चैतमा सार्वजनिक अपराध सम्बन्धी मुद्दामा पक्राउ परेका युवराज लामा र रोजन बस्नेतको दुईरदुई वटा औंठी, मुन्द्रा, एउटा टप र चाँदीको ब्रासलेट गरी ८५ हजार रुपैयाँ बराबरको गहना चोरी भएको हो ।