धादिङ । जीवनको यात्रा सधैँ सोचेअनुसार सहज हुँदैन । कतिपय सफलताका पछाडि अभाव, संघर्ष, त्याग र अवसरको खोजीमा बिताएका कठिन दिनहरू लुकेका हुन्छन् । धादिङको त्रिपुरासुन्दरी गाउँपालिकास्थित महेन्द्रोदय माध्यमिक विद्यालयमा अध्ययन गरेका सरोज थापाको जीवनयात्रा पनि यस्तै संघर्ष र निरन्तर प्रयासको कथा हो ।
विद्यार्थी जीवनमा पढ्ने तीव्र इच्छा हुँदाहुँदै आर्थिक तथा भौतिक स्रोतसाधनको अभाव झेलेका थापा अहिले वैदेशिक रोजगारीको सिलसिलामा साउदी अरबमा छन् । उनी अन्तर्राष्ट्रिय धादिङ समाजको कार्यसमिति सदस्य तथा अन्तर्राष्ट्रिय धादिङ समाज साउदी अरबका संयोजकका रूपमा सामाजिक गतिविधिमा सक्रिय छन् ।
सामाजिक सेवामा अग्रपंक्तिमा देखिँदै आएका थापाले आफ्नो विद्यार्थी जीवनका संघर्षका दिन सम्झँदै शिक्षक तथा गुरुहरूप्रति कृतज्ञता व्यक्त गरेका छन् । उनले सामाजिक सञ्जालमा सार्वजनिक गरेको ‘मुलपानीको भान्छादेखि कार्यकारी कार्यकक्षसम्म’ शीर्षकको संस्मरणमा बाल्यकालको अभाव, शिक्षाप्रतिको लगाव र गुरुहरूले गरेको सहयोगलाई स्मरण गरेका छन् ।
भान्छाको काम गर्दै ट्युसन पढ्ने अवसर
थापाका अनुसार विद्यार्थी जीवनमा पढाइप्रतिको रुचि र भविष्य बनाउने सपना ठूलो थियो । तर आर्थिक अवस्था सहज थिएन । त्यही क्रममा उनी महेन्द्रोदय माध्यमिक विद्यालयका शिक्षक चिनकाजी श्रेष्ठको आवासमा पुग्ने गर्थे ।
शिक्षक श्रेष्ठको घरमा खाना बनाउन र भान्छाको काममा सहयोग गर्दै उनले निःशुल्क ट्युसन पढ्ने अवसर पाएका थिए । साथीहरू खेलकुद र मनोरञ्जनमा रमाइरहँदा आफू भने भविष्य निर्माणको सपना बोकेर पढाइका लागि संघर्ष गरिरहेको उनले संस्मरणमा उल्लेख गरेका छन् ।
भान्छाको चुलोबाट निस्कने धुवाँसँगै गणितका कठिन समीकरणहरू सुल्झाएका ती दिन उनका लागि सामान्य थिएनन् । तर शिक्षक चिनकाजी श्रेष्ठले देखाएको सद्भाव र सहयोगले उनको शैक्षिक यात्रामा महत्वपूर्ण भूमिका खेलेको थियो ।
अक्षर चिनाउनेदेखि उच्च शिक्षासम्मको यात्रामा महेन्द्रोदय माध्यमिक विद्यालयका सम्पूर्ण गुरुहरूको योगदान रहेको थापा बताउँछन् । आज आफू जुन स्थानमा पुगेको छु, त्यसको आधार गुरुहरूले दिएको शिक्षा, संस्कार र मार्गदर्शन नै भएको उनको भनाइ छ ।
गणितका सूत्रबाट जीवन बुझ्ने प्रयास
विद्यालयमा ऐच्छिक गणित अध्ययन गर्दा सिकेका साइन (Sin), कोसाइन (Cos) र ट्यान्जेन्ट (Tan) लगायत त्रिकोणमितिका सूत्रहरू अहिले पनि आफ्नो स्मृतिमा ताजै रहेको थापा सम्झन्छन् ।
उनले त्रिकोणमितिका सूत्रलाई जीवनसँग जोड्दै मेहनत, सही मार्गदर्शन र बलियो आधारको महत्व व्याख्या गरेका छन् ।
साइनले उचाइ र सम्बन्ध, कोसाइनले आधारको महत्व तथा ट्यान्जेन्टले उचाइ र आधारबीचको अनुपात बुझाएजस्तै जीवनमा पनि लक्ष्य, आधार र सन्तुलन आवश्यक हुने उनको बुझाइ छ ।
विद्यार्थी हुँदा गणितका सूत्रहरू व्यावहारिक जीवनमा कहाँ प्रयोग हुन्छन् भन्ने लाग्ने गरे पनि अहिले व्यवस्थापन, प्रविधि र संस्थागत निर्णय प्रक्रियामा समेत गणितीय सोच, सन्तुलन र विवेकको महत्व महसुस भइरहेको उनले उल्लेख गरेका छन् ।
उनले आफ्नो जीवनको विगतलाई स्मरण गर्दै मुलपानीको त्यो गाउँ, महेन्द्रोदय विद्यालयको आँगन र आफूलाई शिक्षा दिने गुरुहरूको योगदानलाई जीवनको अमूल्य सम्पत्तिका रूपमा व्याख्या गरेका छन् ।
साउदी अरबमा रहेर पनि सामाजिक सेवामा सक्रिय
अहिले वैदेशिक रोजगारीको सिलसिलामा साउदी अरबमा रहेका थापा आफ्नो व्यक्तिगत जीवन र रोजगारीसँगै जन्मभूमि धादिङको सामाजिक गतिविधिमा समेत जोडिएका छन् ।
उनी अन्तर्राष्ट्रिय धादिङ समाजको कार्यसमिति सदस्य तथा अन्तर्राष्ट्रिय धादिङ समाज साउदी अरबका संयोजक हुन् । प्रवासमा रहेर पनि जिल्लाको सामाजिक, मानवीय तथा परोपकारी गतिविधिमा सक्रिय रहँदै आएका थापाले विदेशमा रहेका धादिङवासीलाई जन्मभूमिको सुखदुःखसँग जोड्ने काममा भूमिका निर्वाह गर्दै आएका छन् ।
पछिल्लो समय भोटेकोसी हुँदै त्रिशूली नदीमा आएको बाढीबाट प्रभावित धादिङका नागरिकहरूलाई समेत उनले व्यक्तिगत रूपमा पाँच लाख रुपैयाँभन्दा बढी आर्थिक सहयोग गरेका थिए । बाढीका कारण घरबार गुमाएका, विस्थापित भएका तथा समस्यामा परेका परिवारलाई सहयोग गर्ने क्रममा उनले व्यक्तिगत तर्फबाट गरेको यो सहयोगले विपद्का बेला जन्मभूमिप्रतिको जिम्मेवारी र मानवीय संवेदनालाई दर्शाउँछ ।
विदेशमा रहेर आफ्नो परिवार र भविष्यका लागि श्रम गरिरहेका थापाले जन्मभूमिमा आइपर्ने विपत्तिमा समेत सहयोगको हात बढाउँदै आएका छन्। सामाजिक सेवाप्रतिको यही निरन्तरता उनको व्यक्तित्वको अर्को महत्वपूर्ण पक्ष बनेको छ।
संघर्षका दिन बिर्सन नहुने सन्देश
थापाले आफ्नो संस्मरणमा अहिलेको व्यस्तता, जिम्मेवारी र कार्यकारी पदभन्दा पनि विगतका संघर्षका दिन तथा आफूलाई बाटो देखाउने गुरुहरूको योगदानलाई ठूलो सम्पत्तिका रूपमा लिएका छन् ।
उनले लेखेका छन्, “मेरो अतीतको त्यो संघर्ष र गुरुहरूको निस्वार्थ आशीर्वाद नै आजको यो कार्यकारी पदको वास्तविक शक्ति केन्द्र हो ।”
जीवनमा सफलताको उचाइमा पुग्दै गर्दा विगतका संघर्ष र आफूलाई सहयोग गर्ने व्यक्तिहरूलाई बिर्सन नहुने उनको सन्देश छ । आफूलाई शिक्षित, सक्षम र जिम्मेवार बनाउन योगदान पुर्याउने सम्पूर्ण गुरुहरूप्रति उनले सम्मान व्यक्त गरेका छन् ।
मुलपानीको एउटा भान्छामा खाना पकाउँदै पढ्ने अवसर खोजेका सरोज थापाको विद्यार्थी जीवनदेखि साउदी अरबमा रोजगारीसँगै सामाजिक नेतृत्व र मानवीय सेवामा सक्रिय वर्तमानसम्मको यात्रा मेहनत, इच्छाशक्ति, गुरुहरूको मार्गदर्शन र जन्मभूमिप्रतिको जिम्मेवारीसँग जोडिएको छ ।
उनको संस्मरणले सफलता केवल व्यक्तिगत उपलब्धि मात्र नभई आफूलाई यहाँसम्म पुर्याउने व्यक्ति, समाज र जन्मभूमिप्रतिको कृतज्ञता पनि हो भन्ने सन्देश दिएको छ ।
