धादिङ । सुनसरीको देवानगञ्ज गाउँपालिका–३ कप्तानगञ्जमा गत साउन १० गते भएको दुःखद घटनामा ज्यान गुमाएका ओमप्रकाश महतो र जयप्रकाश महतो का परिवार तथा गृह मन्त्रालयबीच ७ बुँदे सहमति भएको छ ।
साउन १४ गते भएको सहमतिअनुसार गृहमन्त्रीको उपस्थितिमा मृतक परिवारले उठाएका माग सम्बोधन गर्ने प्रतिबद्धता जनाइएको हो ।
सहमतिका मुख्य बुँदाहरू
- नेपाल सरकारबाट दुवै मृतकलाई शहीद घोषणा गर्न आवश्यक प्रक्रिया तत्काल अघि बढाइने ।
- मृतकका परिवारलाई प्रति परिवार १० लाख रुपैयाँ नेपाल सरकारबाट उपलब्ध गराइने ।
- साउन १० गते देवानगञ्जका–३, कप्तानगञ्जमा भएको घटनाको निष्पक्ष र प्रभावकारी छानबिन गरी दोषीउपर प्रचलित कानुनबमोजिम आवश्यक कारबाही प्रक्रिया अघि बढाइने ।
- घटनासँग सम्बन्धित मस्जिदको कानुनी हैसियत तथा सम्बन्धित विषयवस्तुबारे आवश्यक छानबिन तत्काल सुरु गरिने ।
- प्रत्येक मृतकका परिवारका एक जना योग्य सदस्यलाई रोजगारीको अवसर उपलब्ध गराइने ।
- घटनाको अध्ययनका लागि गठित छानबिन समितिले पेश गर्ने प्रतिवेदनका सुझाव तथा सिफारिसहरू कानुनबमोजिम कार्यान्वयन गरिने ।
- मृतकहरूको सम्झनामा गाउँपालिकाको उपयुक्त स्थानमा स्थानीय सरकारसँगको समन्वयमा स्मृति पार्क निर्माण गरिने ।
सहमतिपत्रमा मृतक परिवारका अभिभावक तथा गृहमन्त्री सुजन गुरुङले हस्ताक्षर गरेका छन् । सहमतिपछि मृतकका परिवारले आन्दोलनका कार्यक्रम स्थगित गर्ने अपेक्षा गरिएको छ ।
