नेपालमा स्थानीय तहको न्यायिक समिति स्थानीय विवादहरुको समाधानका लागि जिम्मेवार निकाय हो । यदि तपाईंले कुनै विवाद वा समस्या समाधानका लागि न्यायिक समितिमा उजुरी दर्ता गर्न चाहनुहुन्छ भने तलको प्रक्रिया अपनाउन सक्नुहुन्छः ।
१. उजुरीको तयारी
सबैभन्दा पहिले, आफूले उजुरी दिन चाहेको विषय स्पष्ट रुपमा उल्लेख हुने गरी निवेदन तयार गर्नुहोस् ।
२. निवेदनमा समावेश गर्नुपर्ने विवरणः
क. निवेदकको नाम, ठेगाना, र सम्पर्क नम्बर
ख. विपक्षी व्यक्तिको नाम, ठेगाना, र विवरण
ग. विवादको प्रकार (जमिनको विवाद, पारिवारिक झगडा, ऋणसम्बन्धी समस्या, घरायसी हिंसा आदि)
घ. विवादको विवरण र माग गर्ने पक्षको दाबी
ङ. प्रमाणहरु (कागजात, साक्षीको विवरण)
३. निवेदन बुझाउने स्थान
त्रिपुरासुन्दरी गाउँपालिकाको कार्यामा रहेको न्यायिक समिति सचिवालयमा बुझाउनुपर्छ ।
४. उजुरी दर्ता प्रक्रिया
क. न्यायिक समितिमा उजुरी दर्ता फारम भर्नुपर्छ ।
ख. निवेदनमा उल्लेख गरिएको प्रमाण संलग्न गर्नुपर्छ ।
ग. उजुरी दर्ता गरिसकेपछि निवेदकलाई दर्ता नम्बर दिइन्छ ।
५. छलफल प्रक्रिया
क. उजुरी दर्ता भएपश्चात दुवै पक्षलाई छलफलका लागि बोलाइन्छ ।
ख. छलफलमा दुवै पक्षको कुरा सुनेर न्यायिक समितिले मध्यस्थता गर्न सक्छ ।
ग. यदि सहमति भएमा समझदारीपत्र बनाइन्छ ।
घ. सहमति नभएमा निर्णयपत्र जारी गरिन्छ ।
६. निर्णय कार्यान्वयन
निर्णयमा उल्लिखित आदेश कार्यान्वयनका लागि स्थानीय प्रशासन, प्रहरी, वा सम्बन्धित निकायलाई निर्देशन दिन सकिन्छ ।
७. समयावधि
सामान्यतः १५ दिनदेखि ३० दिनभित्र फैसला गरिन्छ ।
जनहितका लागि
त्रिपुरासुन्दरी गाउँपालिका
