धादिङ । धादिङको खनियावास गाउँपालिका स्थित वडा नम्बर ३ (साबिक वडा नम्बर ४) मा रहेको कुरी गाउँ सांस्कृतिक र प्राकृतिक सम्पदाले भरिपूर्ण गाउँ हो । यहाँ करिब २५० घरधुरी र १५ सय जनसंख्या छ । सुन चौर’ अर्थात् कुरी गाउँमा रहेको ल्याक्चेकुन्ड प्रचार प्रसारका लागि स्थानीयहरुले विभिन्न कार्यक्रहरु गर्दै आईरहेका छन् । जस अन्तरगत शनिबार प्रथम ल्याक्चेकुन्ड खुल्ला दौड प्रतियोगिता सम्पन्न भएको छ ।
प्रतियोगितामा युवा समुह तर्फ यू-१६ का बिबेक तामाङ, बाबु समुह तर्फ ४० वर्ष माथि गंगाबहादुर तामाङ, युवती तर्फ यू-१६ की सृजना तामाङ र आमा समुह तर्फ ३५ वर्ष माथिमा सानुमायाँ तामाङ प्रथम हुन सफल भए ।
ऐतिहासिक ल्याक्चे कुण्ड
यस ऐतिहासिक पोखरी (ल्याक्चे कुण्ड) संसारको सृष्टि भए देखि नै अवस्थित रहेको अनुमान स्थानीयवासीको छ । निकै अघि पोखरी धेरै गहिरो रहेको र एक्कासी पोखरी भन्दा माथिबाट पहिरो आएकाले कुण्ड धेरै हदसम्म पुरिएको किम्बदन्ती छ । क्याफे मालिक तामाङको भने कुण्डलाई लिएर केही फरक कथन पेश गरे । उनका अनुसार, लाक्चे (लक्चे) भन्ने एउटा फल हुन्छ, जो लहरामा फल्छ । यसलाई ‘लहराना’ पनि भनिन्छ । सोही फलको नामबाट कुण्डको नामकरण गरिएको हुनुपर्ने उनको मत छ ।
यस कुण्डमा ठुलो एकादशीमा मेला लाग्छ । मेलामा बोन धर्मावलम्बीहरू (स्थानीय भाषामा झाँक्री) अर्थली, कुरी एवम् झार्लाङदेखि आउने गर्छन् । कुण्डमा विभिन्न किसिमका चराचुरुङ्गीहरू आइ पानी माथि खेलिरहेको देखिन्छ, तर पछिल्ला वर्षहरूमा पानी सुक्दै जाँदा चराहरू आउने क्रम घट्दो क्रममा रहेको तामाङ बताउँछन् । “ल्याक्चे स्कुल भएको ठाउँमा पहिले अर्को दह थियो, स्कुल बनाउदा सो दह पुरियो । त्यसको मूल सम्भवतः अर्कैपट्टि लाग्यो । पछी पहिरो आयो । लेते पनि आयो । र, ल्याक्चे कुण्ड पनि सिमेटिदै गयो”, उनी भन्छन् ।
जाडोयाममा पनि कुण्डमा तातो पानी
कुण्ड कार्तिकसम्म पानी टलपल टलपल भरिएको हुन्छ । स्थानीयवासीहरू त्यतिबेला यही कुण्डमा नुहाइधुवाई गर्ने गर्छन् । कुण्डदेखि थोरै माथि पानीको मुहान छ, जो जाडो याममा तातो हुने गर्दछ । ल्याक्चे कुण्डमा हिउँ पनि पर्दछ, तर, पछिल्लो समय हिउँ पर्ने सिलसिला कम हुँदै गएको छ । अघिल्लो साल परेको हिउँ ३/४ दिनसम्म बसेको थियो ।
ल्याक्चे कुण्ड संरक्षण समूहले हरेक वर्ष साउने संक्रान्तिको भोलिपल्ट अर्थात् साउन २ गते पौडी प्रतियोगिता समेत आयोजना गर्दै आइरहेको छ । यस प्रतियोगिताको दिन स्थानीय एवम् आन्तरिक पर्यटकको उल्लेख्य उपस्थिति रहने गर्दछ । सुन्दर कुरी गाउँलाई अझ थप सुन्दरता बनाइदिने यस ऐतिहासिक पोखरीको संरक्षणमा स्थानीय सरकार लागिरहँदा यसको प्रचार-प्रसारमा अझ ध्यान दिन सके बेसै हुने देखिन्छ ।
