धादिङ । अमेरिकामा रहेर नेपाली समुदायको सेवामा योगदान पुर्याउँदै आएका समाजसेवी तथा गैरआवासीय नेपाली संघ (एनआरएनए) अमेरिकाका उपाध्यक्ष दिवाकर पाण्डे सम्मानित भएका छन् । न्यूयोर्कको टाउन अफ ओइस्टर बे (Town of Oyster Bay) ले पाण्डेले समुदायप्रति पुर्याएको सेवा र योगदानको कदर गर्दै अक्टोबर १९ लाई ‘दिवाकर पाण्डे दिवस’ (Diwakar Pandey Day) घोषणा गरेको हो ।
लङ आइल्यान्ड नेपाली समाजले आयोजना गरेको दशैँ सांस्कृतिक साँझका अवसरमा पाण्डेलाई सम्मान गरिएको हो । नेपाली संस्कृति, चाडपर्व र समुदायबीचको सम्बन्धलाई जोड्ने उद्देश्यले आयोजित कार्यक्रममा दशैँको सांस्कृतिक उत्सवसँगै समाजसेवामा योगदान पुर्याउने व्यक्तित्वको सम्मान गरिएको जनाइएको छ ।
को हुन् दिवाकर पाण्डे?
धादिङसँग सम्बन्ध राख्ने दिवाकर पाण्डे नेपाली समुदायमा सामाजिक सेवामार्फत परिचित छन् । उनी सन् २००७ देखि अमेरिकामा बस्दै आएका छन् । अमेरिका जानुअघि उनले धादिङको नीलकण्ठ क्याम्पसमा प्राध्यापकका रूपमा काम गरेका थिए ।
पाण्डे धादिङ नेपाली समाजका संस्थापक सदस्यसमेत हुन् । उनी सन् २०१८ देखि २०२० सम्म समाजको पहिलो निर्वाचित अध्यक्ष बनेर काम गरेका थिए । त्यसपछि गैरआवासीय नेपाली संघ राष्ट्रिय समन्वय परिषद् (एनआरएनए एनसीसी) अमेरिकामा सन् २०२३ देखि २०२५ सम्म सहकोषाध्यक्षको जिम्मेवारी सम्हालेका उनी सन् २०२५ देखि उपाध्यक्षका रूपमा कार्यरत छन् ।
पाण्डेको पारिवारिक विवरणअनुसार उनकी श्रीमती इन्दिरा सिम्खडा पाण्डे, छोरी डा. मनोरमा पाण्डे र छोरा प्रभाकर पाण्डे छन् ।
भूकम्पपीडितदेखि विद्यार्थीको छात्रवृत्तिसम्म सहयोग
पाण्डेले नेपालमा विपद् प्रभावित, विद्यार्थी तथा समुदायका विभिन्न क्षेत्रमा सहयोग पुर्याउँदै आएका छन्।
भूकम्पका बेला धादिङको तत्कालीन आगिन्चोक गाविसका वडा नम्बर १, २ र ३ का ३३५ घरपरिवारलाई खाद्यान्न वितरण गरिएको थियो। प्रत्येक परिवारलाई ३० किलो चामल, आधा किलो दाल, आधा लिटर तेल, एक प्याकेट नुन र एक किलो चिनी उपलब्ध गराइएको विवरण छ।
त्यस्तै, धादिङको गोलाङस्थित भीमोदय माध्यमिक विद्यालयमा १० लाख रुपैयाँको छात्रवृत्ति सहयोग गरिएको जनाइएको छ। यसले आर्थिक अवस्था कमजोर भएका विद्यार्थीको शैक्षिक निरन्तरतामा सहयोग पुग्ने अपेक्षा गरिएको छ।
कोरोना महामारीका समयमा पनि उनले नेपाली समुदायका विभिन्न व्यक्तिलाई सहयोग गरेका थिए। यसबाहेक विभिन्न सामाजिक तथा सहयोगमूलक कार्यक्रममार्फत उनले समुदायसँग जोडिएर काम गर्दै आएका छन्।
समुदायप्रतिको योगदानको कदर
अमेरिकाको न्यूयोर्कस्थित टाउन अफ ओइस्टर बेले अक्टोबर १९ लाई ‘दिवाकर पाण्डे दिवस’ घोषणा गर्नु उनको सामाजिक योगदानको सम्मानका रूपमा हेरिएको छ । यसले विदेशमा रहेर पनि नेपाली समुदाय, मातृभूमि र सामाजिक सेवासँग जोडिएर काम गर्ने व्यक्तित्वको योगदानलाई उजागर गरेको छ ।
नेपाली समुदायका सदस्यहरूले विदेशमा नेपाली संस्कृति संरक्षण, आपसी सहयोग र सामाजिक एकता कायम गर्न विभिन्न कार्यक्रम सञ्चालन गर्दै आएका छन् । लङ आइल्यान्ड नेपाली समाजको दशैँ सांस्कृतिक साँझ पनि यस्तै सांस्कृतिक तथा सामुदायिक गतिविधिमध्येको एक हो ।
