पोखरा मंसिर ३ –
सार्वजनिक जग्गा र सडक अतिक्रमण गरी पोखरामा बनाइएका संरचना हटाउने काम सुरु गरिएको छ ।
पोखरा उपमहानगरपालिकाले शुक्रवार पृथ्बी राजमार्ग अन्तर्गत विजयपुर खोला आसपास बनेका घर टहरा भत्काएको हो । साथै सडक छेउमा राखिएका होडिङ वोर्ड समेत हटाइएको छ । मापदण्ड मिचेर बनेका संरचना हटाउने काममा पोखरा उपमहानगरपालिका, पोखरा उपत्यका नगरबिकास समिती, विभिन्न राजनीतिक संयन्त्रका पदाधिकारी , प्रहरीको पनि सहभागी थिए ।
पोखरा उपमहानगरपालिका संगै पोखरा उपत्यका नगरबिकास समितीले अतिक्रमित सार्वजनिक जग्गा संरक्षण गर्नमा तत्परता देखाएको छ । अतिक्रमित घरटहरा हटाउने अभियानमा भेटिएका पोखरा उपत्यका नगरबिकास समितीका अध्यक्ष प्रकाश मोहन खनालले पोखरा उपत्यका नगरबिकास समितीले पनि पोखराको बसपार्क निर्माणका लागी अतिक्रमित घरटहरा हटाउने तयारीमा रहेको वताए । विभिन्न राजनीतिक संयन्त्रहरु संग छलफल भइरहेको र पोखराको बृहत्तर बिकास संगै पोखरा बसपार्क निर्माणका लागी सुकुम्बासीलाई हटाउने तयारी गरिएको उनले बताए ।
पहिलो चरणमा बिजयपुर खोला देखि पृथ्वीचोक सम्म सडकको दाँयाबाँया रहेको अतिक्रमित घरटहरा तथा होर्डिङ बोर्ड हटाइने पोखरा उपमहानगरपालिकाका कार्यकारी अधिकृत नवराज ढुंगानाले वताए । पहिलो चरण सकिएपछि पोखराका अन्य क्षेत्रमा मापदण्ड विपरित निर्माण भएका घरटहरा र सार्वजनिक जग्गा अतिक्रमण गरी बसेका बस्तीहरुमा डोजर लागाइने उनले वताए । पहिला सुचना दिने र सुचना दिदा पनि अटेर गरेको खण्डमा नगरपालिका आफैले डोजर प्रयोग गरी सार्वजनिक जग्गामा निर्माण भएका घरटहराहरु हटाउने उनको चेतावनी छ ।
