धादिङ असोज ८
यति एअरलाइन्सको विमान भैरहवास्थित गौतमबुद्ध अन्तर्राष्ट्रिय विमानस्थलमा अवतरण गर्नेक्रममा शनिबार अपराह्न दुर्घटनामा परेको छ ।
काठमाडौंबाट भैरहवाका लागि अपराह्न ४ः१५ मा उडेको ‘९एन एआइडी’ कलसाइनको जहाज अवतरणकाक्रममा धावनमार्गबाट घुम्नेक्रममा दुर्घटनामा परेको हो ।विमान धावनमार्गको १५० मिटर दक्षिणतर्फ पुगेको छ ।जम्मा १९ जना यात्रु र तीन चालकदलका सदस्य रहेको विमानमा मानवीय क्षति भने भएको छैन । केही यात्रु सामान्य घाइते भएका छन् ।
दुर्घटनास्थलमा अहिले नेपाली सेना, विमानस्थलका सुरक्षा अधिकारीलगायतले उद्धार गरिरहेका छन् ।दुर्घटनासम्बन्धी थप विवरण आउन बाँकी रहेको नागरिक उड्डयन कार्यालय भैरहवाले जनाएको छ । रासस
