धादिङ नेपाली समाज अमेरिकाको बाढीपीडित सहयोग अभियान जारी, ७६ जना जोडिँदा १७ हजार ३२३ डलर संकलन

धादिङ । धादिङ नेपाली समाज अमेरिकाले धादिङका बाढी, पहिरो तथा प्राकृतिक विपत्तिबाट प्रभावित परिवारलाई सहयोग गर्ने उद्देश्यले सञ्चालन गरेको आपत्कालीन राहत कोष तथा सहयोग अभियान जारी रहेको छ ।

समाजका अध्यक्ष सागर अधिकारीका अनुसार अभियानमा हालसम्म अमेरिकामा रहेका ७६ जना सहयोगदाता जोडिएका छन् भने सहयोग गर्ने क्रम अझै जारी रहेको छ । हालसम्म ७६ जना सहयोगदाताबाट कुल १७ हजार ३२३ अमेरिकी डलर संकलन भएको समाजले जनाएको छ ।

गत अगस्ट २६, २०२६ मा धादिङ नेपाली समाज अमेरिकाका अध्यक्ष सागर अधिकारीको अध्यक्षतामा सम्पन्न आकस्मिक जुम बैठकले धादिङमा बाढी, पहिरो तथा प्राकृतिक विपत्तिबाट प्रभावित परिवारलाई राहत तथा सहयोग पुर्‍याउने उद्देश्यले आपत्कालीन राहत कोष स्थापना गर्ने सर्वसम्मत निर्णय गरेको थियो ।

राहत कोषलाई व्यवस्थित, पारदर्शी र प्रभावकारी रूपमा सञ्चालन गर्न समाजका वरिष्ठ उपाध्यक्ष राज गुरुङको संयोजकत्वमा तीन सदस्यीय समिति गठन गरिएको छ ।

राहत कोष सञ्चालन समिति

• संयोजक: राज गुरुङ — वरिष्ठ उपाध्यक्ष
• सदस्य सचिव: हरि गिरी — महासचिव
• सदस्य: एलान तामाङ — कोषाध्यक्ष

समाजले अमेरिकाका ५० वटै राज्यमा छरिएर रहेका सम्पूर्ण धादिङवासीलाई यस मानवीय अभियानमा जोडिन आह्वान गरेको छ । आफ्नो क्षमताअनुसार स्वेच्छिक आर्थिक सहयोग गरी विपत्तिमा परेका जिल्लावासीलाई सहयोग गर्न समाजले आग्रह गरेको हो ।

७६ सहयोगदाताबाट १७ हजार ३२३ डलर

समाजले सार्वजनिक गरेको विवरणअनुसार हालसम्म निम्न सहयोगदाताबाट रकम प्राप्त भएको छ ।

Zelle मार्फत सहयोग गर्न सकिने

राहत अभियानमा सहयोग गर्न चाहनेहरूले Zelle मार्फत रकम पठाउन सक्ने व्यवस्था गरिएको छ ।

Zelle: dhadingsamajamerica@gmail.com

उपलब्ध गराइएको QR Code Scan गरी आफ्नो बैंकको App मार्फत पनि Zelle बाट सहज रूपमा सहयोग रकम पठाउन सकिने समाजले जनाएको छ ।

समाजका अनुसार अभियानमार्फत प्राप्त हुने सम्पूर्ण सहयोग रकमको पारदर्शी रूपमा अभिलेख राखिनेछ । आवश्यक समन्वय गरी धादिङका बाढी, पहिरो तथा प्राकृतिक विपत्तिबाट प्रभावित वास्तविक पीडित परिवारसम्म राहत तथा सहयोग पुर्‍याइने जनाइएको छ ।

धादिङमा बाढी तथा पहिरोका कारण विभिन्न क्षेत्रमा जनधनको क्षति तथा विस्थापनको अवस्था सिर्जना भएपछि स्वदेश तथा विदेशमा रहेका धादिङवासी, विभिन्न संघसंस्था तथा व्यक्तिहरूले राहत तथा सहयोग अभियान सञ्चालन गर्दै आएका छन्।

यसैक्रममा धादिङ नेपाली समाज अमेरिकाले पनि संस्थागत रूपमा आपत्कालीन राहत कोष स्थापना गरी सहयोग अभियान अघि बढाएको हो । समाजले अभियानमा सहभागी सम्पूर्ण सहयोगदाता तथा सहयोग गर्न इच्छुक धादिङवासीप्रति धन्यवाद व्यक्त गर्दै थप सहयोगका लागि आह्वान गरेको छ ।