धादिङ समाज जापानद्वारा बाढी–पहिरो पीडितका लागि १० लाख येन सहयोग

टोकियो, जापान । बाढी–पहिरो तथा प्राकृतिक विपत्तिबाट प्रभावित नेपालीको सहयोगार्थ धादिङ समाज जापानले ४८ घण्टे विशेष आर्थिक अभियान सञ्चालन गरी १० लाख ४३ हजार ९४८ जापानी येन (करिव नेपाली रु. ९ लाख ९४ हजार ८६६) संकलन गरेको छ ।

धादिङ समाज जापानका अध्यक्ष विमल श्रेष्ठका अनुसार अभियानमार्फत संकलित सम्पूर्ण रकम आजै प्रधानमन्त्री दैवी प्रकोप उद्धार कोषमा जम्मा गरिने भएको छ।

स्वदेशमा बाढी–पहिरो तथा प्राकृतिक विपत्तिबाट प्रभावित नागरिकलाई राहत पुर्‍याउने उद्देश्यले समाजले छोटो अवधिमा विशेष आर्थिक अभियान सञ्चालन गरेको हो। अभियानमा धादिङ समाज जापानसहित जापानमा रहेका विभिन्न व्यक्ति तथा सहयोगीहरूले व्यक्तिगत रूपमा आर्थिक योगदान गरेका छन् ।

समाजका अनुसार अभियानबाट कुल १० लाख ४३ हजार ९४८ जापानी येन संकलन भएको हो । संकलित रकम विपदबाट प्रभावित नागरिकको राहत तथा उद्धारका लागि प्रयोग हुने अपेक्षा गरिएको छ ।

कसले कति सहयोग गरे ?

विपद्मा सहयोगका लागि धन्यवाद

धादिङ समाज जापानले विपद्को समयमा छोटो सूचनाका बाबजुद अभियानमा सहभागी भएर आर्थिक सहयोग गर्ने सम्पूर्ण सदस्य, सहयोगी तथा दाताहरूलाई धन्यवाद दिएको छ ।

समाजले विदेशमा रहेर पनि मातृभूमिमा आइपरेको विपत्तिमा सहयोग गर्ने अभियानमा सहभागी सबैको योगदान महत्वपूर्ण रहेको जनाएको छ ।

संकलित रकम प्रधानमन्त्री दैवी प्रकोप उद्धार कोषमा जम्मा भएपछि विपदबाट प्रभावित नागरिकको राहत तथा उद्धारमा सहयोग पुग्ने विश्वास गरिएको छ ।