धादिङ । नेपाली भाषा र साहित्यका आदिकवि भानुभक्त आचार्य को २१३ औँ जन्मजयन्ती आज देशभर विभिन्न कार्यक्रम गरी मनाइँदैछ । नेपाली भाषालाई जनजनसम्म पुर्याउन अतुलनीय योगदान दिएका भानुभक्तको स्मरण गर्दै हरेक वर्ष असार २९ गते भानु जयन्ती मनाइने गरिन्छ ।
भानु जयन्ती कहिलेदेखि मनाउन सुरु गरियो ?
भानुभक्त आचार्यको जन्म वि.सं. १८७१ असार २९ गते तनहुँको चुँदीराम्घामा भएको थियो । उहाँको जन्मजयन्ती मनाउने परम्परा भने उहाँको जन्मपछि धेरै वर्षपछि सुरु भएको हो ।
इतिहासअनुसार वि.सं. १९७१ (सन् १९१४) मा भानुभक्तको जन्मशतवार्षिकीका अवसरमा मोतीराम भट्ट लगायतका साहित्यकारहरूको पहलमा औपचारिक रूपमा भानु जयन्ती मनाउन थालिएको मानिन्छ । त्यसयता नेपालभित्र मात्र होइन, विश्वभर रहेका नेपाली समुदायले पनि भानुभक्तप्रति सम्मान व्यक्त गर्दै यो दिवस मनाउने गरेका छन् ।
भानु जयन्ती किन मनाइन्छ ?
भानु जयन्ती मनाउनुका प्रमुख उद्देश्यहरू यस्ता छन्–
- नेपाली भाषाका आदिकवि भानुभक्त आचार्यप्रति सम्मान प्रकट गर्नु ।
- नेपाली भाषा, साहित्य र संस्कृतिको संरक्षण तथा प्रवर्द्धन गर्नु ।
- नयाँ पुस्तालाई साहित्य सिर्जना र मातृभाषाप्रति प्रेरित गर्नु ।
- भानुभक्तका साहित्यिक योगदानको स्मरण गर्दै अध्ययन र अनुसन्धानलाई प्रोत्साहन गर्नु ।
- नेपाली भाषाको एकता, पहिचान र मौलिकताको संरक्षण गर्नु ।
भानुभक्तले संस्कृतमा रहेको रामायणलाई सरल नेपाली भाषामा अनुवाद गरेपछि नेपाली भाषा सर्वसाधारणसम्म पुग्न ठूलो योगदान पुगेको मानिन्छ । उहाँका घाँसी, बधूशिक्षा लगायतका कृतिहरू नेपाली साहित्यका अमूल्य सम्पत्ति मानिन्छन् ।
धादिङबेसीमा पनि विशेष कार्यक्रम
यसैबीच, धादिङबेसीस्थित भानुपार्कमा आज दिउँसो १ बजे विशेष कार्यक्रमसहित भानु जयन्ती मनाइने भएको छ ।
भानु प्रतिष्ठान धादिङका अध्यक्ष डा. नवीन बन्धु पहाडीका अनुसार कार्यक्रममा साहित्यकार, कवि, लेखक, शिक्षक, विद्यार्थी तथा साहित्यप्रेमीहरूको सहभागिता रहनेछ । कार्यक्रममा भानुभक्त आचार्यको व्यक्तित्व र कृतित्वमाथि चर्चा, कविता वाचन तथा सम्मान कार्यक्रमसमेत आयोजना गरिने तयारी गरिएको छ ।
भानु प्रतिष्ठानले सम्पूर्ण साहित्यप्रेमी तथा सर्वसाधारणलाई कार्यक्रममा सहभागी भई आदिकवि भानुभक्त आचार्यप्रति सम्मान व्यक्त गर्न आग्रह गरेको छ ।
