काठमाडौं । एशिया रग्बीको आयोजना र नेपाल रग्बी सङ्घको व्यवस्थापनमा यहि असोज १८ र १९ गते काठमाडौं स्थित दशरथ रङ्गशालामा एशिया इमिरेट्स रग्बी सेभेन्स ट्रफी प्रतियोगिता हुनेभएको छ ।
नेपाली टिम सन् २०१६ देखि एशिया रग्बीमा सहभागी हुँदै आएको भएतापनि नेपालमा एशियाली स्तरको सिनियर रग्बी प्रतियोगिता हुन लागेको यो पहिलो पटक हो ।
प्रतियोगिताको विजयी महिला तथा पुरुष टोलीले एशिया रग्बीको ट्रफीसहित स्वर्ण पदक, दोस्रो हुनेले रजत र तेस्रो हुने टोलीले कांस्य पदक प्राप्त गर्नेछन् । यो प्रतियोगिता २०२५ मा हुने एशिया रग्बी सेभेन्स सिरिजको छनोटको रुपमा समेत रहनेछ ।
