धादिङ । यहि मिति २०८१ आषाढ ०९ देखी १५ गते सम्म राष्ट्रिय खेलकुद परिषदको कभर्डहल त्रिपुरेश्वर काठमाण्डौमा सञ्चालन हुन लागेको सहाना प्रधान यू-१९ महिला तथा पुरुष भलिबल प्रतियोगितामा बागमती प्रदेशको टिममा धादिङका इज्जत दनै र सलिना गुरुङ छनोट भएको दिलिप मगरले धादिङपोष्टलाई बताए ।
अषाढ ५ गते बुधवार पुरुषको जाउलाखेल भलिवल प्रशिक्षण केन्द्रमा र महिलाहरुको न्यू डाईमण्ड स्पोर्टस क्लबमा बागमती प्रदेशले उक्त प्रतियोगिताका लागि खेलाडी छनोट गरेको थियो । बागमती प्रदेशको टिममा पुरुष तर्फ इज्जत र महिला टिममा सलिन छनोट भएको छनोट समितिलाई उदृढ गर्दै धादिङका भलिबल रेफ्रि समेत रहेका मगरले बताए ।
धादिङका इज्जत दनै बंगलादेशमा सम्पन्न यू‐१९ अन्तर्राष्ट्रिय आमन्त्रित भलिबल प्रतियोगिता समेत खेलि सकेका खेलाडी हुन भने सनिला क्लव स्तरीय प्रतियोगितामा राम्रो प्रर्दशन गर्दै आएकी खेलाडी हुन् ।
सात प्रदेशका महिला र पुरुष टिमले प्रतिस्पर्धा गर्ने सहाना प्रधान यू-१९ महिला तथा पुरुष भलिबल प्रतियोगिताको विजेताले ३ लाख, उपविजेताले २ लाख तथा तेस्रो हुनेले एक लाख नगद हात पार्नेछन् । यस्तै प्रतियोगिताको महिला तथा पुरुषतर्फकै सर्वोत्कृष्ट खेलाडीले २५ हजार र विधागततर्फका उत्कृष्ट खेलाडीलाई जनही १० हजार पुरस्कार प्रदान गरिनेछ । प्रतियोगितामा सहभागी सम्पूर्ण टिमको यातायात, बसोबास, खाना र भत्तासहितको खर्च प्रतिष्ठानले ब्यहोर्ने छ ।
