आज मंसिर २५ गते आज भन्दा १६ ठिक वर्ष अघि आजैका दिन धादिङ जिल्लाले एउटा होनहार क्रान्तिकारी योद्धा नवराज सिंखडा (मुकन्द) गुमाएको दिन । जनताको पक्षमा वकालत गर्ने र माओवादीलाई नजिकबाट मायाँ गर्ने मुकुन्द तात्कालिन शाही सेनाको जागिर छाडेर जनमुक्ति सेना बन्नु भएको थियो । उहाँको २०६१ मंसिर २५ गते तात्कालिन माओवादीले संचालन गरेको जनयुद्धको क्रममा राज्यपक्षबाट यातना पूर्वक हत्या गरिएको थियो ।
महान योद्धा मुकुन्दको जिवनी
नवराज सिंखडा (क.वसन्त) को जन्म नीलकण्ठ नगरपालिका स्थित ज्यामरुङ, भारमाले भन्ने ठाउँमा निम्न किसान परिवारमा बुवा टंक प्रसाद सिंखडा र आमा जमुना कुमारी सिंखडाको कोखबाट वि.स.२०२४–१२–२९ गते चौंथो सन्तानका रुपमा भएको थियो ।
उहाँ सानै देखि अन्यायको विरोध गर्ने, विद्रोही स्वभावको हुनुहुन्थ्यो । ज्यामरुङ स्थित शंखदेबी उ.मा.वि.मा ५ कक्षा सम्म अध्ययन गर्नुभयो भने एस.एल.सी. पास अचने उ.मा.वि. खहरेबाट गर्नु भएको थियो ।
उहाँले नेपाली सेनामा जागीर गर्दै क्याम्पस प्राइभेटमा पढ्नु भएको थियो । BA तेस्रो वर्षको बाँकी रहेको १ विषयको जाँच दिने वेला शान्ति सेनामा जानी कोटा परेकोले उहाँको पढाई त्यही रोकिएको थियो । उहाँको विवाह संस्कार अनुसार नै मछिन्द्र सिंखडा सित भयो । उहाँका छोरा आषिश सिंखडा र छारी अस्मिता सिंखडा हुनुहुन्छ ।
उहाँमा कम्युनिष्ट प्रभाव परे पनि तत्कालिन शाही सेनामा जागिर खाईसके पछि राजनितिकमा भावनात्मक सम्बन्ध मात्र रह्यो । जव जनयुद्ध अगाडी बढ्यो सेना पनि परिचालन हुन थाल्यो । सर्वसाधारण जनताको दिन दाडै कत्ले आम गर्न सरकार लाग्न थाल्यो । तव जनताकै कर खाएर त्यही जनता माथि गोली वर्षाउने काम सहन नसकेर विद्रोही स्वभावका नवराज नवराज सिंखडा (बसन्त) वि.स.२०६० मंसिरमा तत्कालिन शाही सेनाबाट विद्रोह गरी माओवादीमा प्रवेश गर्नुभएको थियो ।
उहाँले विद्रोह गर्दा सेनाको नायक पोेष्टमा नुवाकोटमा कार्यरत हुनुहुन्थ्यो । पार्टीको योजना अनुसार तीन जना साथीको साथ एउटा एक्सनमा जाँदा रुपन्देही जिल्लाको बुटवलमा तत्कालिन शाही सेनाको घेरामा पर्नुभयो । दुई जना साथी घेरा तोड्न सफल भए तर उहाँलाई भने गिरफ्तार पर्नु भयो । शाही सेनाले पार्टीको गोपनियता खोल्नलाई अनेकौ प्रलोभन यातना दिए तर पनि उहाँले दुश्मनका कुनै पनि कुरालाई स्वीकार्न तयार नभई वि.स.२०६१ मंसिर २५ गते उहाँले मृत्यु स्विकार गर्नुभयो ।
छोटै समयमा आफ्नो कार्य कुशलताले गर्दा पार्टीको एरिया सेक्रेटरीको जिम्मा पाईसक्नु भएका नवराज भौतिक रुपमा रहनु भएन तर पनि उहाँको सपना साकार पार्न हामीहरु लागीरहने छौं । मृत्यु सबैको अवश्यभावी छ । जो भौतिक रुपमा ढलेर गएपनि इतिहाँसका पानामा जिउँदा मानिसका मानसपटलमा सधै–सँधै घुमि रहने छन् । देश र जनताको पक्षमा आफ्नो भौतिक शरीरको प्रवाह नगरी मृत्युवरण रोज्ने बसन्त जस्ता हजारौं सहिदहरु प्रति श्रद्धा सुमन ।