धादिङ । धादिङको गङ्गाजमुना गाउँपालिका–५ का ३७ वर्षीय सुशील गुरुङ विदेशी मुद्रासहित रसुवाबाट पक्राउ परेका छन् ।
प्रहरीका अनुसार गुरुङ भारतीय तीर्थयात्रीहरूको गाइड बनेर माउन्ट कैलाश–मानसरोवर यात्रामा जाँदै थिए । रसुवाको बेत्रावती क्षेत्रमा गरिएको सुरक्षा जाँचका क्रममा उनको साथबाट लुकाइछिपाइ राखिएको ४३ हजार अमेरिकी डलर बरामद गरिएको हो ।
जिल्ला प्रहरी कार्यालय रसुवाका अनुसार गुरुङ ३० जना भारतीय तीर्थयात्रीसहित यात्रामा रहेका थिए । शंकास्पद गतिविधि देखिएपछि प्रहरीले जाँच गर्दा विदेशी मुद्रा फेला परेको जनाएको छ ।
बरामद गरिएको रकमको स्रोत, उद्देश्य तथा घटनासम्बन्धी अन्य पक्षबारे थप अनुसन्धान भइरहेको प्रहरीले जनाएको छ ।
