धादिङ मंसिर १६ । धादिङको त्रिपुरासुन्दरी गाउँपालिका स्थित त्रिपुरासुन्दरी माईको मेला मंसिर १९ र २० गते हुँदैछ । यस मेलाको अवसरमा खुल्ला 9-A side फुटबल प्रतियोगिता र वृहत साँस्कृतिक कार्यक्रम सँगै हेलिकप्टरबाट मनोरम दृश्य अवलोकन गर्न पाईने व्यवस्था आयोजकले गरेको छ ।
न्यु त्रिपुरासुन्दरी युवा क्लब (Ntyc Club Dhading) र त्रिपुरासुन्दरी मन्दिर संरक्षण समितिको संयुक्त आयोजनामा हुने फुटबल प्रतियोगिता हाँसेपसल बगरमा मंसिर १७ गतेबाट सुरु हुनेछ भने फुटबलको समापन तथा पुरस्कार वितरण, वृहत साँस्कृतिक कार्यक्रममा अर्थ मन्त्री जनार्दन शर्मा प्रभाकर र कृष्ण कडेलको इन्द्रेणी टिम आउने भएका छन् ।
यस वर्षको मेलालाई विशेष बनाउन र आन्तरिक पर्यटनलाई बढावा दिन आयोजकले हेलिको समेत प्रवन्ध गरेको छ । २० गते बिहान सल्यानकोट स्थित मन्दिरबाट त्रिपुरासुन्दरी माईलाई सल्यानबेसी मन्दिरमा माई भित्राउदा हेलिकप्टरले पुष्पवृष्टि गर्ने दिपक पाण्डेले धादिङपोष्टलाई बताए ।
हेलिकप्टरबाट मनोरम दृष्य अवलोकन विभिन्न धार्मिक स्थनको अवलोकन तथा पुजाआजाको लागि पनि हेलि चड्न सकिने उनले बताए । पाण्डेका अनुसार सल्यानबेसी मन्दिर परिसरबाट सल्यानकोट मन्दिरको दर्शन गरेर फर्किएको (५ मिनेटको उडान) टिकट दर ६ हजार, सल्यानबेसी मन्दिर परिसरबाट सल्यानकोट मन्दिर गंगाजमुना दर्शन र गणेश हिमाल अवलोकन गरि फर्किएको १३ हजार र सल्यानबेसी मन्दिर परिसरबाट मनकामना मन्दिर दर्शन गरि फर्किएको १३ हजार ५०० टिकट दर रहेको छ । हेलिकप्टरको अग्रिम टिकट बुकिङको लागि दिपक पाण्डे 9851038214 र राजेन्द्र सिटौला 9843145958 लाई सम्पर्क गर्न सकिने आयोजकले जनाएको छ ।
प्रथम पुरस्कार १ लाख ११ हजार १११ रूपैया र उपविजेतालाई ५५ हजार ५५५ रूपैया पुरस्कार दिईने १० औं न्यु त्रीपुरासुन्दरी कप 9-A side फुटबल प्रतियोगिताको लागि टिम दर्ताको अन्तिम मिति आज सम्म दिईएको छ । टिम दर्ताको लागि थप जनाकारी आवश्यक परे सम्पर्क ब्यक्ति दिपेन्द्र शाह 9848856542, मनोज पाण्डे 9816151705, विशाल खाण 9866280744, रामशरण पाण्डे 9851086408 लाई सम्पर्क गर्न सकिने समेत जनाएको छ ।
त्रिपुरासुन्दरी मेलाको बारेमा
ऐतिहासिक तथा पुरातात्विक महत्व बोकेको यस स्थानको बारेमा शिलालेखमा उल्लेख भए बमोजिम नेपाल एकीकरणको बेला पृथ्वीनारायण साहले यसै त्रिपुरा भगवतीको आशिर्बाद पाएपछि मात्र नुवाकोट तथा काठमाडौंको बिजय सम्भव भएको हो भन्ने उल्लेख गरिएको छ ।
प्राचिन कालदेखि शाहवंशिय राजाहरुले बिशेष महत्वका साथ यस स्थानमा पुजापाठ गर्ने गरेको तथ्य भेटिन्छ । यस त्रिपुरासुन्दरीको सल्यानकोट र आगिन्चोक १ स्थित सल्यानबेसीमा गरेर दुइ वटा मन्दिर रहेको छ ।
मङ्सिर महिनामा माथि डांडाको मन्दिरबाट भगवतीको मुर्तिलाई बाकसभित्र राखी पिठ्युमा बोकेर करिव तिन घण्टाको पैदल दुरीमा पुगिने सल्यानबेशिको मन्दिरमा ल्याइन्छ । रानामगर थरका पुजारीले मात्र छुन मिल्ने त्यस मुर्ति कस्तो आकारको छ वा त्यस बाकसभित्र के छ भनेर आम सर्बसाधारणहरुले अहिलेसम्म केहि देख्न पाएका छैनन् । तिमिल्सेना र सापकोटा थरका पुरोहित र रानामगर थरका पुजारीले बाहेक अन्यले हेर्न र छुन नपाउने अनौठो प्रचलन समेत यस मन्दिरमा रहिआएको छ ।
अन्य मन्दिरले भन्दा फरक प्रकृतिको विशेषता बोकेको यस मन्दिरको त्रिपुरा भगवतीको मुर्ति कसैले छुन नपाएपनि यस मन्दिरमा भने परम्परादेखि नै सबै जातजातिका श्रद्धालु भक्तजनहरुले सहज रुपमा पुजाआजा गर्न पाउने ब्यबस्था रहेको छ । धार्मिक महत्वसंगै यस जात्राको प्रबर्धन गर्न सके धार्मिक पर्यटनको समेत प्रचुर सम्भावना रहेको एक तिर्थस्थलसंगै पर्यटनको लागि समेत उपयुक्त गन्तब्य बन्न सक्ने त्रिपुरासुन्दरीको मन्दिरलाई बिकास र सम्बर्धनका लागि सरकारले बिशेष कार्ययोजना ल्याउनुपर्ने देखिन्छ ।
नेपालका यिनै धार्मिक तथा ऐतिहासिक महत्व बोकेका स्थलहरुको उचित प्रचारप्रसार एबं सम्बर्धन गर्न सकियो भने आर्थिक सामाजिक तथा सास्कृतिक बिकास गर्न सकिने विश्वास लिएको छ । जिल्ला सदरमुकाम धादिङबेसीबाट चालिस किलोमिटर उत्तरतर्फ पर्ने यो मन्दिरमा जात्रा हेर्नका लागि छिमेकी जिल्ला नुवाकोट,चितवन, गोरखा, काठमाडौ लगायतका ठाउँहरुबाट हजारौं मानिसहरु पनि आउने गर्दछन् ।
