चौथो इन्डो नेपालमा धादिङलाई ६ स्वर्ण

धादिङ माघ १९ । जापान गोजुरियो कराते डो केन्वाकाई नेपाल संघ चितवनले आयोजना गरेको चौथो इन्डो नेपाल कराते च्याम्पियनसीपमा धादिङका ६ जनाले स्वर्ण पदक जितेका छन् ।

चितवनको भरतपुरमा निर्माणाधीन गौतमबुद्ध अन्तर्राष्ट्रिय क्रिकेट रङ्गशालामा शनिबार सम्पन्न उक्त प्रतियोगितामा धादिङबाट विभिन्न उमेर समुहका १४ जना खेलाडीले भाग लिएको मा ६ जनाले स्वर्ण, दुई रजत र पाँच कास्य पदक जितेका थिए ।

धादिङका खेल प्रशिक्षक दिपक रानाका अनुसार नेपाल र भारत बीच भएको यस प्रतियोगितामा धादिङबाट सहभागि भएका खेलाडीहरुले उत्कृष्ट खेल प्रदर्शन गरेका थिए ।

माघ १६ देखि १८ गतेसम्म संचालन भएको उक्त प्रतियोगितामा नेपाल र भारतका गरी ३५० जना खेलाडीहरुले सहभागिता जनाएका थिए ।