धादिङ असार २२
अर्जेन्टिनाबाट प्रकाशित हुने ‘ला नेसन’ अखबारका अनुसार मेसीले अन्तर्राष्ट्रिय फुटबलमा आफ्नो सहभागिता जारी राख्ने भएका छन् । आगामी नोभेम्बरबाट हुने विश्वकप क्वालिफाइ चरणका खेलमा उनी अर्जेन्टिनाको जर्सी लगाएर मैदानमा उत्रिने भएका छन् ।
कोपा अमेरिकाको फाइनलमा चिलीसँग पराजित भएलगत्तै अर्जेन्टिनी स्टार खेलाडी लियोनेल मेसीले अन्तर्राष्ट्रिय फुटबलबाट सन्यासको घोषणा गरेपछि निराश भएका प्रशंसकहरुका लागि खुसीको खबर आएको छ ।
अर्जेन्टिनी टिमकै पूर्व सदस्यलाई उद्धृत गर्दै सो अखबारले मेसी पुनः राष्ट्रिय टिममा फर्कने दाबी गरेको हो ।
आगामी सेप्टेम्बर र अक्टोबरमा हुने खेलमा भने उनी नखेल्ने जनाइएको छ । तर नोभेम्बरदेखि मेसीले अर्जेन्टिनाको जर्सी लगाएर मैदानमा आफ्नो कला देखाउने सो अखबारको दाबी छ ।
मेसीलाई सन्यासको निर्णय फिर्ता लिन अर्जेन्टिनाका राष्ट्रपति, महान फुटबलर डियागो म्याराडोना, मेसीका सहकर्मीहरु लगायत लाखौं शुभचिन्तकले आग्रह गर्दै आएका छन् । (एजेन्सी)
