अन्तर्राष्ट्रिय नेपाली साहित्य समाज (अनेसास), डेनमार्क च्याप्टरले आयोजना गरेको कविता प्रतियोगिता–२०२५ मा धादिङको बेनीघाट रोराङ गाउँपालिकाका कवि महान त्यागीको कविता “छाउगोठकी कामाख्या” प्रथम हुन सफल भएको छ ।
प्रतियोगितामा धनगढी, कैलालीका कवि प्रेमप्रकाश सापकोटाको कविता “प्रेरणा”ले द्वितीय स्थान हासिल गरेको छ भने गान्तोक, सिक्किमका कवि गोपाल निशोधीको कविता “बोनसाई मेरा रहरहरू” तृतीय स्थानमा परेको छ ।
नेपाली भाषा, साहित्य र काव्यका विज्ञ कवि प्रतीक ढकाल, वरिष्ठ साहित्यकार प्रभा भट्टराई र वरिष्ठ साहित्यकार लालगोपाल सुवेदी सम्मिलित निर्णायक मण्डलद्वारा मूल्याङ्कन गरिएको प्रतियोगितामा जम्मा ४६ कविता प्राप्त भएका थिए ।
यसअघि असारमा नेकपा (एमाले) को जनसंगठन राष्ट्रिय जनसांस्कृतिक महासंघ नेपाल, गण्डकी प्रदेशले आयोजना गरेको खुला कविता प्रतियोगितामा पनि महान त्यागीको कविता प्रथम भएको थियो ।
विजयी कवि–कवयित्रीहरूले पुरस्कारस्वरूप पुस्तक, प्रमाणपत्र तथा एक थान हाते उपहार (गिफ्ट ह्याम्पर) प्राप्त गर्ने अध्यक्ष पूर्ण बस्नेतले जानकारी दिए ।
अन्तर्राष्ट्रिय नेपाली साहित्य समाज (अनेसास), डेनमार्क च्याप्टरले आयोजना गरेको कविता प्रतियोगिता-२०२५ मा प्रथम भएको महान त्यागिको कविता जस्ताको तस्तैः
कविताः छाउगोठकी कामाख्या
एउटा बिहान,
मेरो भित्रैबाट फूट्यो-एक नदी,
रातो, न्यानो र जीवनको भाषा बोल्ने नदी ।
तर गाउँको आँखामा त्यो नदी
पापको पोखरी थियो ।
मष्टो रिसाउने भयले
मलाई थुनियो-
ईश्वर हराएको अँध्यारो गोठमा ।
मेरो शरीर त्यो मन्दिर थियो,
जहाँ सृष्टिको दीप बालिएको थियो,
तर उनीहरूले मलाई ईश्वरहीन मानें ।
घामले डाँडाको पर्खाल नाघेर
अन्धकार फैलाइरहँदा
चन्द्रमाले पनि मुहार लुकायो,
शीर निहुराएर धरती
मेरो अगाडि ठिङ्ग उभिइन् ।
मेरो आत्माले सोध्यो-
“म स्त्री भएर जन्मेँ, कि अपराध ?”
घरको भित्तामा टाँसिएको देवीको तस्वीरले
मलाई हेरेर चुप लाग्यो,
सायद उसलाई पनि लाज लागिरहेको थियो-
आफ्नै प्रतिविम्बलाई अपवित्र भनिएकोमा ।
तर म जान्दछु-
मभित्र बगेको नदी
श्राप होइन,
शक्तिको सुरुवात हो ।
सिर्जनाको बीज मन्त्र हो ।
मेरै कोखबाट जन्मिन्छन्
सम्भावनाका गीतहरू ।
म अब यो मौनताको पिँजडा तोड्छु ।
गोठसँगै भत्काउँछु कुप्रथाको कालकोठरी पनि ।
नयाँ बिहानको उज्यालो बोकेर
विद्रोहको राँको बाल्छु ।
स्वतन्त्रताको बिगुल फुक्छु ।
म सर्वपूज्य
कामाख्या देवी हुँ ।
मेरो रगत-
अपराध होइन,
यो त पृथ्वीको श्वास हो,
जीवनको लय हो,
सृष्टिको पहिलो स्वर हो ।
