दिपक लामिछाने सुबोध
तात्कालिन नेकपा माओवादीले संचालन गरेको १० वर्षे जनयुद्धको क्रममा हजारौ जनाले वलिदान गरे, अनि त्यसैको बलमा जनआन्दोलन भयो । यी महत्वपूर्ण दुई आन्दोलनले नेपालको राज्य व्यवस्था मात्र परिवर्तन गरेन विस्तारवाद र सामाज्यवादीहरुमा समेत एउटा तरंग पैदा गर्यो । अहिले आमुल परिवर्तनको शंखघोष भएको जनयुद्ध नेपाली इतिहासमा दर्ज भैसकेको छ ।
यहि जनयुद्धको क्रममा ०६२ साल साउन ७ गते (आजै) का दिन धादिङका दुई नेताहरुले बलिदानी गर्नु भएको थियो ।
आज उनै दुई सहिदहरुको विषयमा स्मरण गर्न चाहान्छु ।
साउन ७ गते हामी कहिल्यै विर्सदैनौ, किनकी धादिङको केवलपुरका कृष्ण वाग्ले (कमरेड रामजी ) र भुमेस्थानका किशोर बस्नेत (कमरेड हिमाल) को सहादत प्राप्त गरेको दिन हो ।
यी दुई कमरेडहरुलाई एकै दिन फरक-फरक ठाउँमा गाँजा तस्करहरुले विभत्स ढंगले हत्या गरेका थिए । ०६२ असारमा पार्टीले धादिङ र मकवानपुरको माथिल्लो क्षेत्रमा गाँजा नष्ट गर्ने अभियान चलाएको थियो ।
यो कार्यक्रम पछि स्थानीय किसानहरु भन्दा गाँजा तस्करहरु भयभीत भएका थिए । पार्टी प्रति अत्यन्त लगनशिल कमरेड हिमाल किरान्चोकमा पार्टी कामकै सिलशिलामा जाँदै हुनुहुन्थ्यो बाटोमा यात्रा गर्ने क्रममा संगठीत भएर बसेका गाँजा तस्करहरुले गाँजा नस्ट गर्ने तेरै पार्टी हैन भन्दै निर्मम र विभत्स ढंगले हत्या गरेका थिए ।
यस्तै अर्का सहिद कमरेड रामजीलाई पनि कामको शिलशिलामा जाँदै गर्दा संगठीत भएर बसेका मकवानपुरका गाँजा तस्करहरुले हत्या गरे । वि.स.२००७ सालमा किसान परिवारमा जेठो छोराको रुपमा जन्मिएका कमरेड वाग्ले सामान्य राजनितीक चेतना आए देखि नै कम्युनिष्ट विचारधारा प्रति आस्थावान हुनुहुन्थ्यो ।
राजनीतिलाई पेशेवर ढंगले नै त उहाँले तत्कालिन नेकपा माओवादीको पूर्णकालिन कार्यकर्ता भएर मात्र गर्नु भयो तर भावनात्मक रुपमा सामान्य समर्थन भने उहाँले मशाल, एकता केन्द्र, जनमोर्चा हुदै तत्कालिन नेकपा माओवादीलाई गर्दै आउनु भएको थियो ।
वि.स.२०६० फागुन १० बाट उहाँ नेकपा माओवादीमा पूर्णकालिन कार्यकर्ता हुनुभयो । पाको उमेर र खह्रो स्वभावका क. रामजी पार्टीले दिएको जस्तो सुकै जिम्मेवारीलाई पनि इमान्दारी पूर्वक पूरा गर्नुहुन्थ्यो । क. रामजी छोटो समयमा जिल्ला पार्टी सल्लाकार हुनुभयो ।
वर्गिय दुश्मनका अनेकौ अप्रेशन, धरपकडहरुलाई चिर्दै देश र जनताको पक्षमा काम गर्दै पार्टीको योजना अनुसार मकवानपुर जिल्लामा निरन्तर खटीरहनु भएको थियोे ।
वि.स.२०६२।४।७ मकवानपुरको एक स्थानीयको घरमा तात्कालिन मकवानपु-धादिङका सेक्रेटरी मुकुन्द पौडेल रमन, इलाका इन्चार्ज म आफै (दिपक लामिछाने सुबोध), कृष्ण वाग्ले (कमरेड रामजी ), नुवाकोटकी सावित्री घिमिरे सामना लगाएतका नेता तथा कार्यकर्ता बसिरहेको बेला भरुवा बन्दुक सहित आएका गाँजा तस्करहरुले घेराहाले । म र पौडेलले लगायतले बन्दुक सहित आएका गाँजा तस्करहरुको घेरा तोड्न सफल भएपनि तस्करहरुले रामजी र सामनालाई विभत्स हत्या गरेका थिए ।
