खोटाङ चैत्र ६ । हलेसी तुवाचुङ नगरपालिका–९ सल्ले हात्तीटार खोटाङमा केटाकेटीले आगो खेलाउँदा चार घरमा आगलागी भएको छ ।
केटाकेटीले खेलाएको आगो हावाले उडाएर घर सल्किँदा लोकेन्द्र माझी, जोखे माझी, सीतादेवी माझी र झनबहादुर थापाको घर जलेर नष्ट भएको प्रहरीले जनाएको हो ।
आगलागीबाट झनबहादुरको अनुमानित ८ लाख रुपैयाँ, लोकेन्द्रको ५ लाख रुपैयाँ, जोखेको ५ लाख र सीतादेवीको करिब ४ लाख रुपैयाँ बराबरको धनमाल नष्ट भएको प्रहरीले जनाएको छ ।
आगोलागीबाट मानवीय क्षति भने नभएको प्रहरीले जनाएको छ । मंगलबार अपराह्न भएको आगलागी स्थानीयवासीले साँझ मात्र नियन्त्रणमा लिएका थिए ।
